OSF Malayzia Sei Harii Ospital Internasional iha Dili

Dili, www.news-viptv.com – Grupu empreza hosi Malayzia ne’ebe hamahon an iha Open Society Fundation (OSF) hakarak harii Ospital Internasional iha Dili, Timor-Leste hodi hamenus transferensia pasiente ba rai liur.

Reprezentante OSF, Tiar Chua esplika, ospital ho standar internasional ne’ebe sira hakarak harii ne’e hatoo on aba Prezidenti Republika (PR), Jose Ramos Horta iha Palacio Prezidensial, Kuarta (27/09/2023).

“Planu atu harii ospital standar internasional ne’e bele garante atendementu saude ba ema iha Timor-Leste,” dehan Tiar Chua ba jornalista sira.

Parte OSF iha ona preparasaun hodi halo investimentu iha tinan ne’e, maibe fila fali depende ba kontratu hosi governu.

“Se iha ona akordo, tinan oin bele implementa  ou realiza planu ne’e iha Timor Leste, nune’e iha ona ospital, no doutor espesial sira mos bele mai fo tratamentu ba povu,” nia dehan.

Alende planu investe iha area saude hodi harii ospital internasional, OSF mos informa sira mos interese hodi halo investimentu iha area agrikultura no pekuaria tamba hare’e Timor-Leste mos sei iha dependensia hosi produtu importasaun.

“Timor Leste depende makaas liu ba importasaun materia rai liur, tanba ne’e ami hakarak liu liu halo produsaun naan, no planu sira interese ona investor  sira ba sira-nia an rasik no tipu agrikultura saida deit, atu nune’e bele halo nakonu merkadu iha Timor-Leste inklui mos investor  sira seluk tan,” nia esklarese.

Nune’e mos OSF pronto atu fo treinamentu atu hadia abilidade servisu.

Prezidente Republika Jose Ramos Horta hateten, estadu sei akompana nafatin grupu investidor hosi Malayzia nian ne’e ba sira nia planu no program abele realiza ona iha Timor-Leste.

“Timor leste posivel hodi simu investor sira husi parte hotu inklui mos Malaysia, hodi mai halo investimentu iha Timor Leste, no Prezidente Republika mos husu investor sira husi Malaysia katak planu no programa ne’ebe mak grupu nee aprezenta bele realiza duni iha Timor Leste,” dehan PR Horta.