Nivio Magalhaes Embaixador TL ba Cuba, Laura Abrantes ba CPLP

DILI, www.news-viptv.com – Prezidenti Republika, Jose Ramos-Horta, kuarta dadersan ohin fo posse ba diplomata Timoroan nain rua hodi halo misaun ba iha CPLP no Cuba.

Diplomata nain rua ne’e maka Laura Abrantes nu’udar embaixadora ba CPLP no Nivio Magalhaes nu’udar Embaixador ba Republika Cuba.

Xefi estadu iha nia deskursu hare’e katak CPLP nu’udar organizasaun ba pais lingua Portugues iha kontribuisaun makas ba prosesu independensia Timor-Leste liu hosi involvimentu iha ONU hodi aspira luta povu Timor-Leste nian durante tinan 24.

Entertantu Cuba, kontribui makas mos ba prosesu independensia Timor-Leste nian, inklui apoia rekursu humanu Timor-Leste nian iha area saude liu hosi oferese bolsa estudu ba mediku Timoroan sira.

Vise Ministra assuntu ASEAN, Milena Rangel hateten, posse ba embaixadora CPLP no Embaixador Cuba importante ba servisu diplomatiku Timor-Leste nian hodi kontinua misaun koperasaun ne’ebe iha ona.

Embaixadora Timor-Leste ba CPLP, Laura Abrantes iha nia misaun servisu sei kontinua hametin koperasaun institusional, no sei esforsu oinsa bele buka bolsa estudu ba Timoroan sira ne’ebe hakarak kapasita an iha lingua Portugues, inklui sei lori area ekonomia, seguransa ailmentar, no mudansa klimatika, iha nia misaun.

Entertantu Nivio Magalhaes nu’udar embaixador Timor-Leste ba Cuba, sei kontinua relasaun bilateral no koperasaun ne’ebe estabelese ona, liliu iha area saude, edukasaun no desportu.