Lakon iha Tasi Laran, Bombeiros ho UPM Kontinua Buka Tuir Luis Mendes

DILI, www.news-viptv.com  – Autoridade Protesaun Sivil (APC) informa katak ekipa Bombeiros no Unidade Polisia Maritima kontinua buka tuir Luis Mendes (tinan 37) nudar peskador iha Liquisa ne’ebe lakon desde Domingu (16/2/2025) tuku 4 madugada wainhira ba peska ikan iha tasi laran.

“Tuir fontes, kronologia dehan vitima dadersan nakukun tuku 4 madrugada ba peska ikan iha tasi laran maka lá fila ba uma. Agora servisu konjunta Polícia Maritima no Bombeiros Municipio Liquisa halo kedas intervesaun buka vitima iha tasi laran to’o nasaun vizinu Indonésia nian,” informa Xefi Seksaun Relasaun Komunikasaun GREC-APC, Nelson Nunes Orleans ba VIP TV, Segunda (17/2/2025).

Iha konferensia imprensa, APC relata katak durante periodu 10-17 Fevereiru 2025, CNOPC-APC rejista hamutuk uma 33 maka hetan estragus tamba dezstre naturais, inklui Peskador Luis Mendez ne’ebe relata lakon, no ema 2 maka kanek iha Munisipiu Liquisa.

“Kanek nain rua née tamba afeta husi dezastre naturais husi ai tohar mak hanehan uma hodi afeta ba vitima nain rua hetan kanek,” esplika Nelson.

Husi uma 33 ne’ebe hetan estragus, APC verifika ona uma 27 maka priense kriteria hodi hetan kompensasaun. Husi uma 33 ema afetadus nain 179, ema Evakua 59.

Uma ne’ebe hetan estragus sira ne’e husi Munisipio Bobonaro Anin sobu uma 5, Covalima anin sobu uma 1, Ahi han uma 1,Dili anin sobu uma 1, ahi han uma 1, Ermera Anin sobu uma 3, Liquiça Anin sobu uma 9, Viqueque Anin sobu uma 14 no ahi han uma 1.