DILI, www.news-viptv.com – Suku Manleuana sei realiza tan eleisaun ronde daruak ba xefi suku, hafoin rezultadu eleisaun lider komunitaria iha 27 Abril hosi kandidatu nain 4, laiha ida maka manan hetan votos maoria.
Iha apuramentu final hosi total Kandidatu Alexandre Soares Dias hetan votos 1,112, Francisco Tilman 1,032, Jacob Tilman Soares 1,835 no Natercio Ximenes Lago 353.
Prezidenti da Meza Eleisaun Lider Komunitaria Suku Manleuana, Postu Administrativu Dom Alexio, Munisipiu Dili, Estaquio Tilman iha apuramentu final desidi kandidatu nain rua ne’ebe sei avansa ba ronde daruak maka Alexandre Soares Dias no Jacob Tilman Soares.
Ba ronde daruak, prezidenti meza ne’ebe nu’udar mos membru konsellu suku husu ba komunidade sira atu partisipa no sei foti medidas rigorozu wainhira kontinua la partisipa iha festa demokrasia ne’e.
Ho rezultadu ne’e, Kandidatu Jacob Tilman Soares no ekipa susesu hosi kandidatu Alexandre Soares Dias simu rezultadu refere no pronto hakat ba ronde daruak hodi entrega votus final ba komunidade suku Manleuana atu hili se los maka sei asumi kargu Xefi Suku Manleuana nian.
Eleisaun ronde daruak tuir lei sei realiza iha 13 Maiu.
Iha eleisaun lider komunitaria alende hili Xefi Suku, hili mos xefi aldeia no delegadu/aldeia sira. Iha Suku Manleuana hamutuk iha aldeia 10 ne’ebe eleitu ba xefi aldeia maka Carlos Sarmento, ba Aldeia Badiac, Nivio das Dores (Aldeia Efaca), Estaquio Tilman, (Aldeia Lemocari), Alcino Guterres (Aldeia Lisibutak), Mario Borges Soares (Aldeia Lau-Lora), Eusebio Mendonça (Aldeia Mauc), Paulino Pereira Tilman (Aldeia Mane-Mesak), Antonio de Jesus (Aldeia Manleuana), Maria Marquita dos Santos (Aldeia Mundu Perdido), no Augusto Martins do F. da Cruz (Aldeia Ramelau).
Iha eleisaun 27 Abril hosi total eleitor iha Suku Manleuana hamutuk 7,891, eleitor nain 4,533 maka tuir eleisaun.