Kardeál Sira Diskute Situasaun Ekonómika Santa Sé nian iha Kongregasaun Jerál

VATIKANU, www.news.viptv.com – Diretór Gabinete Imprensa Santa Sé nian, Matteo Bruni, hatete ba jornalista sira iha loron-kuarta katak kardeál na’in 180 maka tuir Kongregasaun Jerál ba dala hitu, hosi sira ne’e na’in 124 maka eleitor kardeál sira.

Iha parte dahuluk enkontru nian, kardeál sira ko’alia kona-ba situasaun ekonómika no finanseira Santa Sé nian, ho kontribuisaun sira hosi kardeál sira Reinhard Marx, Kevin Farrell, Christoph Schönborn, Fernando Vergez, no Konrad Krajewski.

Kardeál Marx (LEE: MARS), koordenadór Konsellu ba Ekonomia, aprezenta dezafiu, kestaun no proposta oioin hosi perspetiva sustentabilidade nian, ho objetivu atu estrutura ekonómika sira kontinua apoia reforma sira papadu nian.

Kardeál Schönborn (LEE: SKONBON) ko’alia nu’udar prezidente Komisaun Fiskalizasaun IOR nian, no Kardeál Vergez fahe detalle oioin kona-ba situasaun Governasaun Estadu Sidade Vatikanu nian, hodi temi kona-ba serbisu renovasaun nian ne’ebé hala’o daudaun.

Kardeál Krajewski ko’alia kona-ba atividade sira Dikastériu ba Servisu Karidade nian.

Iha parte daruak Kongregasaun Jerál nian, Kardeál na’in 14 halo intervensaun kona-ba tópiku oioin, inklui ekleziolojia povu Maromak nian no kanek ne’ebé kauza hosi polarizasaun iha Kreda laran no divizaun iha sosiedade; sinodalidade no kolejialidade episkopál nu’udar dalan atu ultrapasa polarizasaun; no vokasaun sira ba amlulik no vida relijioza.

Referénsia oioin halo ba testu konsiliár sira Lumen gentium no Gaudium et spes; no sira diskute kona-ba evanjelizasaun, liuliu foka ba konsisténsia entre buat ne ebé moris no buat ne ebé haklaken.

Kongregasaun Jerál konklui iha tuku 12:30 oras vatikanu nian ho orasaun Regina Coeli nian.