Jeneral Lere Uniku Kandidatu PR ba Estabilidade no Unidade Nasional

DILI, www.news-viptv.com – Ekipa susessu Kandidatu Prezidenti Republika (PR), Jeneral Lere Anan Timur informa katak sira nia kandidatura uniku kandidatu PR ba estabilidade no unidade nasional.

Vito Simões “Udan Bo’ot” nudar porta voz ba ekipa susesu kandidatura Jeneral Lere deklara, alende nudar PR ne’ebe bele garante estabilidade no unidade nasional, Jeneral Lere mos sei lori progressu no dezemvolvimentu ba Timor-Leste wainhira eleitu ba PR.

“Jeneral Lere nudar kandidatu independete, nudar kandidatu ba povu tomak ne’ebe iha nia kandidatura hetan apoiu hosi ita nia veteranu sira, oan saudozu veteranu sira, ferik-katuas, joventude sira no militante hosi partidu politiku hotu ne’ebe ezisti iha Timor-Leste,” dehan Vito Simões, Kuarta (2/2/2022) ba jornalista sira hafoin rejista Jeneral Lere nudar kandidatu PR ne’ebe sei kompete iha Eleisaun Prezidensial 19 Marsu 2022.

Iha nia deklarasaun, lori mos mensajem hosi Jeneral Lere hodi agradese ba apoiante sira ne’ebe fo ona konfiansa ba kandidatu nia an ba eleisaun PR.

Vito informa iha rejistu ne’e, “Maski realmente hetan apoiu kartaun eleitoral kuaze 20 mil i tal, ami lori kuaze 9.400 i tal.”

Maski offisialmente, Jeneral Lere ne’ebe ohin loron reformadu ona hosi F-FDTL, tuir ajenda sei halo nia deklarasaun offisial ba nia kandidatura iha 5 fevereiru 2022 iha Munisipiu Ainaro.

“Tuir ajenda Jeneral sei deklara nia kandidatura iha Ainaro,” dehan Vito.

Iha rejistrasaun kandidatura nian, akompana ekipa ne’e mos iha Deputadu PLP, Cornelio Gama no veteranu balu, inklui eis Ministru Saude, Dr. Nelson Martins.