Horta Sei Lori Balisaun no Kafe Laclubar ba Merkadu Internasional

MANATUTO, www.news-viptv.com – Nudar lideransa politiku nasional ida, Maria Domingas Mikato nia hanoin hanesan mos povu Manatuto no Timor-Leste tomak ne’ebe hakarak duni prezidenti republika foun ida iha tinan lima oin mai, hanesan rezultadu 19 Marsu ne’ebe 46 % hakarak Jose Ramos Horta ba Prezidenti Republika.

Jose Ramos Horta iha nia atividade kampana ne’ebe halao ho modelu dialogu iha Manatuto promesa sei normaliza situasaun politika iha Timor-Leste ne’ebe durante ne’e moris ho impase politika ne’ebe tuir Ramos Horta xefi estadu atual viola ona nia knar tuir konstituisaun RDTL.

Hafoin normaliza situasaun politika ne’e, Ramos Horta ne’ebe fiar metin eleitu ona ba Prezidenti republika sei promove produtu Balisaun no Kafe Laklubar ba merkadu internasional.

Prezidenti Partido Democratiku, Mariano Assanami Sabino iha dialogu ne’e konkorda programa Ramos Horta liliu iha setor ekonomia no dezemvolvimentu, persiza duni xefi estadu ida ne’ebe bele apoiu programa governu nian no ida ne’e Ramos Horta hatudu ona wainhira nia asumi knar nudar prezidneti republika iha 2007-2012.

Reprezenta Partidu CNRT, kuatru vise prezidenti Partidu CNRT, Tomas Cabral iha eleisaun volta daruak fiar katak povu manatuto sei kontinua fo votos maioria ba Ramos Horta hodi bele eleitu ba prezidenti republika foun.

Reportagem: Gantry Meilana