Hetan Atakasaun Fuan, Ministru Justisa Hakotu Iis

Dili, www.news-viptv.com – Ministru Justisa, Amandio da Sá Benevides hakotu iis hafoin hetan atakasaun fuan, Sabadu (20/1/2024).

Ministru Justisa hetan atakasaun fuan hafoin simu Primeiru Ministru Xanana Gusmão ne’ebe foin fila husi vizita estranjeiru iha Aeroportu International Prezidente Nikolau Lobato.

Ekipa mediku konsege halo primeiru sukoru hafoin evakua ba Hospital Nacional Guido Valadares (HNGV), maibe la salva.

Iha perfil matebian nian ne’ebe publika iha portal Ministerio Publico, Amandio Benevides moris iha Ainaro, 16 Jullu 1964. Remata nia lisensiatura iha Direitu Konstitusional iha Universidade Nusa Cendana Kupang, Kupang – Republika Indonezia, iha tinan 1990 fila fali ba Timor-Leste hodi servisu nu’udar advogadu privadu iha Dili, atividade profisionál ida-ne’ebé nia hala’o husi tinan 1991 to’o 1993.

Iha Dili, nia nu’udar funsionáriu públiku husi tinan 1993 to’o 1999. Durante períodu ida-ne’e, nia hala’o kursu oin-oin iha área administrasaun no jestaun publika. Durante Administrasaun Tranzitoriu Nasoins Unidas nian (UNTAET), nia sai hanesan Ministeriu Publiku Timor-Leste nian dahuluk ida-ne’ebé iha pozisaun iha Administrador Sergio Vieira dé Mello nia oin, iha Fevereiru 2000.

Nia hetan nomeasaun nu’udar Advogadu Jeral ba Krime Komún 16 outubru 2001, hodi troka Longuinhos Monteiro, ne’ebé asume pozisaun nu’udar Prokurador Jeral. Maske hetan nomeasaun durante períodu UNTAET, ho aprovasaun ba Dekretu-Lei no. 1/2002, iha rejime transferénsia sistema judisiáriu nian, nia nafatin iha pozisaun to’o 2005.

Iha tinan ne’ebé hanesan, nia remata ona kursu pos-graduaduaduadu iha Estudu Anti-Korrupsaun iha Fatin Universidade iha Hong Kong, Republika Popular Xina. Entre tinan 2004 no 2005 nia kaer pozisaun nu’udar Komisariu Komisaun Nasional Eleisaun (CNE).