Hein TR, PD-CNRT sedauk Koalia Formasaun Governu, TMR Kongratula CNRT

DILI, www.news-viptv.com – Partidu Democratico (PD) lideradu hosi Mariano Assanami Sabino informa nia partidu sedauk bele koalia koligasaun ba formasaun governu, enkuantu rezultadu final eleisaun parlamentar sedauk anunsia hosi Tribunal Rekursu (PR).

“Ita hotu sei hein kontagen husi CNE nian, hein tempu para tribunal sei anunsia ita hotu hein prosesu ne’e, buat hotu lao tuir legalidade ita tenki respeitu prosesu hotu ne´ebe final husi tribunal de rekursu,” dehan Assanami hafoin hasoru malu ho Prezidenti Republika Jose Ramos Horta, iha Palasiu Prezidensial Dili, Kinta (25/5/2023).

Assanami hamutuk ho nia estrutura ezekutivu PD balun hasoru xefi estadu hodi kongratula tinan ida asumi kargu xefi estadu.

“Prezidente Repúblika mós fo parabens ba PD ninia esforsu kontribuisaun liu-liu kampaña ne’ebé mak mensazem Paz nian ho mensajen sira ne’ebé mak ba dezenvolvimentu nian iha palku leten nunka trata ema ida,” nia dehan.

Antes ne´e iha nia konferensia imprensa, Prezidenti Partidu CNRT, Kay Rala Xanana Gusmao mos sedauk bele koalia kona ba formasaun governu tamba hakarak hein dezisaun final hosi CNE no Tribunal Rekursu ba rezultadu votos no kompozisaun fahe kadeira nian.

“Atu dehan deit katak rezultadu ne´ebe sei publika hosi STAE no CNE labele kleuk tun kleuk sae ida ne´edeit, ami hakarak hanesan halimar ami aumenta mais lae. Tamba ida ne´eduni maka, koalia kona ba buat seluk sei akontese hein hosi STAE, hosi Tribunal rasik, CNE fo sai tiha, haruka ba tribunal, tribunal dehan los ona, publika iha jornal republika, foin maka ita hare (formasaun governu),” informa Xanana ba media sira, iha Sede Partidu CNRT, Bairo Grillos, Dili, Tersa (23/5/2023).

Komentariu ba votos PLP ne´ebe tuun, Taur Matan Ruak hateten, “Hau nia liafuan mak ne’e simu buat ne’ebe povu fo, no laos buat ne’ebe ita hakarak,” dehan Taur Matan Ruak ba jornalista sira iha Palásiu Prezidensiál, Díli, Kuarta (24/5/2023).

Ho fuan mos atual primeiru ministru ne´e simu rezultadu no kongratula ba Partidu CNRT ne´ebe povu maioria fo ona votos barak.

“Ha’u hakarak aproveita oportunidade ida-ne’e, patabeniza partidu sira hotu ne’ebé partisipa iha eleisaun no espesiál partidu vensidór CNRT,” nia dehan.

Iha Eleisaun Parmanetar 21 Maiu 2023, iha rezultadu provizoriu ne´ebe anunsia ona hois Sekretariadu Teknika Administrasaun Eleitoral (STAE) PD okupa fatin datoluk ho nia votos 64,493 ou 9,3%.

CNRT ne´ebe komanda hosi Kay Rala Xanana Gusmao nia partidu sai nudar vensedor dahuluk ho nia votos 288,101 (42,62%).

FRETILIN maski sai “ai-tongka” ba VIII Governu hamutuk PLP no KHUNTO hetan deit votos 178,248 (25,75%) dook hosi predisaun Sekretariu Jeral FRETILIN, Mari Alkatiri ne´ebe antes ne´e fiar an katak sei hetan kadeira 40.

Supreza bo´ot mos tuku Partidu Libertasaun Povu (PLP) ne´ebe lidera hosi Jeneral Taur Matan Ruak ne´ebe lakon kadeira 4 hosi 8 ne´ebe antes ne´e hetan iha 2018. Iha eleisaun tinan ne´e, PLP hetan deit votos 40,696 (5,88%).

Entertantu Partidu Kmanek Haburs Unidade Nasionál Timoroan (KHUNTO) nia votos hetan 52,021 (7,52%).

Gabriel Gama ho Jors Moniz kontribui mos ba hakerek notisias ne´e.