Hafasil Servisu Saude, KHUNTO Husu Governu Dijitaliza Sistema Saude

DILI, www.news-viptv.com – Bankada Kmanek Haburas Unidade Timor Oan (KHUNTO) husu ba governu, espesialmente Ministeriu Saude atu dijitaliza sistema saude hodi hafasil servisu atendementu iha saude nian.

Deputadu Antonio Verdial hateten, dijitaliza sistema saude ne’e importante hodi asegura dadus ne’ebe seguru no kualidade iha analiza pasiente nia moras nu’une bele foti desizaun ne’ebe diak.

“Tratamentu saude ne’e lao ho klaru no kualidade maka presiza halo dijitalizasaun sistema saude husi dadus pasiente nian nivel baze to’o nasional,” hateten Deputadu Antonio Verdial, Segunda (24/3/2025), iha plenaria Parlamentu Nasional.

Ba nia atendementu manual dadauk ne’e la tempu ona iha era mudansa teknolojia ne’ebe globalmente mundu uza ona sistema dijital iha area hot-hotu, no wainhira implementa sistema dijitalizasaun, bele evita duplikasaun iha dadus pasiente nian.

Alende ne’e, Bankada KHUNTO husu mos atu ministerium saude tau atensaun ba ekipamentu no mos lojistika iha transporte no telekomunkasoens nian hodi hadiak liu tan prestasaun servisu saude nian.

Iha parte seluk, Deputada Partidu Libertasaun Popular (PLP), Maria Angelina Sarmento kestiona ho ambulansia ne’ebe Ministra Saude Elia Amaral entrega ba Klinika Prezidensia iha Palasiu Prezidensial ne’ebe laos prioridade ba servisu saude, tamba realidade area rurais barak maka se hasoru difikuldade menus ambulansia.

“Ministeriu saúde, foin dadauk ita hare’e katak, ministra saúde, distribui ona ambulansia ida ba sua-selensia  Prezidente Repúblika , ne’ebé ke hau hare laiha lojika, tanba ambulansia ida ne’e atribui ba Prezidente Repúblika ne’ebé iha Dili bele asesu fasil ba sentru saúde sira, ba ospital no iha regalia iha sel-seluk tan, maibé povu ne’ebé mak iha área remotas laiha asesu ba ambulansia,” deklara deputada ne’e.

Nia esplika, akontese dala barak ona, ambulansia iha sentru saude balun avaria no wainhira pasiente persiza uza ambulansia, familia pasiente tenki aluga transporte publiku hodi lori pasiente.

“Foin dadauk akontese iha media sosial ema tau katak, ambulansia avaria iha fatin ida, i senora ida idoza teb-tebes, atu bele transporta nia bá sentru saúde ambulansia laiha tamba avaria hela, i família tenki aluga anguna ida hodi tula idoza ne’e hodi ba iha sentru saúde. Tanba ne’e ami lamenta teb-tebes ita fahe ambulansia ba ida ne’ebé mak la prioridade ba ida ne’ebé mak prioridade liuliu ba povu kiak no kiik sira ne’ebé fasilidade saúde laiha liu ita fahe fali de’it ba polítiku sira ne’ebé bele asesu fasil ba sentru saúde sira ou hospital atu bele halo tratamentu saúde,” dehan Deputada Maria Sarmento.

Nune’e mos, Deputada FRETILIN, Lidia Norberta levanta hikas situasaun vasina ba inan isin rua no bebe foin moris, ne’ebe kontinua sedauk bele fo ba inan ho bebe sira tamba stock vasina mamuk.

“Ohin dadersan hetan katak balun, oan ho fulan 9, ohin dader atu simu vasina, aimoruk vasina laiha, depois dehan sei telefoni wainhira iha ona. Se bele ministra saude responde ida ne’e, kuandu debate orsamentu, dehan diak hela, ne’e saida,” dehan Lidia.

Ho situasaun ne’ebe laiha mudansa, deputada FRETILIN ne’e husu atu governu, liliu ministra saude labele halimar ho povu nia vida.