Evita Violensia, PR Horta Husu Parpol ho GAM Kria Dialogu

  • Share
PR Ramos-Horta koalia hel aho komunidade Ainaro iha Programa Dialogu Komunitaria nian. Photo: Media PR

AINARO, www.news-viptv.com – Xefi Estadu iha nia vizita servisu rai laran kontinua halo dialogu ho komunidade sira no dadauk ne´e halo ho Komunidade iha Munisipiu Ainaro, Sexta (5/8/2022).

PR ramos-Horta wainhira simu hosi lia ain sira iha Dialogu ho Komunidade Ainaro. Photo: Media PR

Iha dialogu ne´e, Prezidente Repúblika (PR), José Ramos-Horta konsidera, diálogu ho tema “ Kultura Ba Dame” hanesan biban ida atu komunidade aprezenta sira nia preokupasaun ba governu no mós hametin kultura dame iha sosiedade, relasiona ho eleisaun parlamentar iha tinan  2023.

banner 336x280

Iha nia komunikadu imprensa ne´ebe redasaun simu, Prezidente Repúblika mós husu partidu polítiku no membru Grupu Arte Marsiais sira atu kria diálogu, nune’e bele simu malu hodi hadi’a naksalak husi violénsia ne’ebé mosu.

“Halo diálogu, hodi rona imi nia preokupasaun ruma, mai ho membru guvernu, ha’u hahu hateten, ita besik ona eleisaun parlamentár foun atu mai, ita hotu bele kolabora atu labele iha instabilidade, atu labele fó inpaktu ba ekonomia no povu nia moris, nune’e iha inísiu hanesan Prezidente, ha’u buka kedas diálogu nasionál ho líder sira, Prezidente Parlamentu, Primeiru Ministru liu-liu ba assuntu ne’ebé hau preokupa, tamba sai Prezidente di’ák presija hetan informasaun husi guvernu no buka diálogu ho guvernu,’’ dehan PR Horta.

Nia mos hateten, Prezidénsia Repúblika sei realiza programa Tour de Timor, Dili Marathona, Festival Kultura Ramelau no seluk tan, hodi kontribui ba promosaun dame, paz no estabilidade hodi ajuda  governu hodi hala’o prosesu dezenvolvimentu.

‘’Iha primeiru prezidensial 2007, ita foin sai husi krize, ha’u kria Tour de Timor, Marathona Internasionál, Festivál Ramelau, Kail, até halo konkursu prezepiu, nu’udár promosaun ba dame iha Timor ba Mundu, atu tane guvernu hodi kria unidade iha rai-laran nune’e, husik guvernu fokus ba dezenvolvimentu iha rai-laran,’’ nia deklara.

Maske iha tinan 2019 to’o 2021, atual Xefe Estadu ne’e la iha pozisaun polítika, maibe kontinua apoia governu hodi kombate COVID-19 iha Timor-Leste.

PR Ramos-Horta. Photo: Media PR

“Krize bo’ot iha mundu, inpaktu bo’ot ba guvernu, entaun ita buka atu tane malu atu povu labele hamlaha, ekonomia tenke ba oin tamba ekonomia la laó ba oin, mundu agora krize. Ita tinan ida ho balun tan, ita atu tama ASEAN,” dehan PR Horta.

Relasiona ho programa nutrisaun, Xefe Estadu promote atu apoia governu, hodi kombate subnutrisaun iha Timor-Leste.

Iha diàlogu ne’e, Administrador husi Maubisse, Hatubiolico, Hatu’udo no Ainaru Villa, aprezenta preokupasaun kona qba Estrada, eletresidade, asessu ba bé mós, saúde no seluk tan.

“Tinan ne’e selebrasaun loron proklamasaun 2022, sei hala’o iha Ainaru, maibé ami nia estrada husi postu mai vila la diák, nune’e mos idozu no ema ho difisiénsia balun lakon direitu, mal-nutrisaun kontinua-ás tambá estrada ladiak hodi ajuda, no Ainaru nafatin tane malu,” informa Administrador Postu Administrativu Ainaru Vila, Agapito de Fátima.

Líder komunitáriu ne’e mós preokupa kona ba possibiliade produsaun petróleu husi Bayu Undang ne’ebé atu maran iha tempu besik, maibé Xefe Estadu responde katak, governu luta hela atu dada kadoras mai Timor-Leste.

Diálogu ne’e partisipa husi Membru governu, autoridade lokál, veteran no komunidade husi Munisípiu Aianru.

Tuir sensus 2010, Ainaro Iha abitantes 59.175 mil no iha potensialidade ba seitor argikultura no turizmu. Maioria habitante sira ko’alia dalen mambae.

Durante okupasaun Indonésia, àrea barak iha Ainaro sai abrigu ba guerilleiru sira to’o ukun an.

  • Share

Leave a Reply

Your email address will not be published. Required fields are marked *

error: Content is protected !!