Baucau Rejista Obitu Kazu Dengue 1

DILI, www.news-viptv.com – Numeru obitu kazu dengue iha Timor-Leste kontinua aumenta, hafoin Baucau rejista ema ida mate tamba dengue.

Alende Baucau ne’ebe rejista obitu 1, Dili mos aumenta tan numeru obitu 1 tan no total kazu obitu tamba dengue hamutuk 50 iha teritoriu Timor-Leste tomak.

Iha publikasaun Ministeru Saude nian loron 7 Abril 2022, Baucau durante ne’e rejista kazu dengue hamutuk 251. Entertantu Dili iha kazu hamutuk 2.693 no total kazu Timor-Leste hamutuk 4.043.

Hosi numeru 50 obitu dengue nian, Dili rejista ho numeru as liu maka 27. Tuir kedan munisipiu Covalima 7, Ermera 4, Aileu 2, Ainaro 2, Bobonaro 2, Viqueque 2, Baucau 1, Manatuto 1, Manufahi 1, no Oecusse 1.

Ba kazu obitu dengue nian, maioria labarik maka rejistradu sai vitima. Iha tinan 2021, Timor-Leste rejista deit kazu 901 no kazu obitu 11.

Governu liu hosi Ministeriu Saude dadauk ne’e kontinua fahe informasaun no sosializasaun ba komunidade sira atu kuidau no halo prevensaun ba moras dengue hodi labele husik ambiente besik ka uma laran sai fatin ka knuk ba susuk aedes aegypti.

Susuk ne’e bainbain barak moris iha fatin be’e laran no lixu fatin.

Alende fahe informasaun no halo limpeza, ministeriu saude ho nia parseira sira halo mos fumigasaun (fogging) tama sai bairo no uma sira ne’ebe iha kazu dengue nian.