Selu US$ 20, PLP Kestiona Distribuisaun Farda Eskola ba Estudante Sira

DILI, www.news-viptv.com – Bankada Partidu Libertasaun Populár (PLP) kestiona Ministeriu Edukasaun (ME) ne’ebé hasae folin farda eskola nian ba estudante sira ne’ebé laiha kbi’it.

Deputada PLP Maria Angelina Sarmento iha nia intervensaun hateten, iha informasaun katak eskola sira iha ona farda ba estudante sira ne’ebé prepara husi ME no halo ona lansamentu ba farda foun.

Maibé, deputada ne’e esplika, iha eskola balu hanesan 4 de Setembru no 10 de Dezembru iha inkontru ida ne’ebé realiza ho inan-aman sira, diresaun eskola husu atu sira submete osan kada ema ida US$ 20.

“Ami husu katak farda hirak ne’e sei sosa fali ka Ministeriu Edukasaun distribui gratuitamente. Tamba inan-aman balu hato’o mai katak, sira laiha kondisaun ekonómika atu tau osan sosa farda ho presu US$ 20, se sira nia oan tolu ou ha’at sira laiha kbiit finanseiru atu bele sosa ida ne’e. Se governu mak prepara farda, bele husu inan aman sira kontribui, maibé se di’ak liu kontribuisaun ida ne’ebé ho kuantidade kiik, hare mós ba sira nia kbiit rasik atu nune’e sira bele sosa farda ba sira nia oan sira,” dehan Deputada Maria Angelina Sarmento, Segunda (24/3/2025), iha Plenaria Parlamentu Nasional.

Iha sorin seluk mós Deputadu Bankada FRETILIN Antoninho Doutel iha plenaria mos levanta menus professor sira iha aldeia Furak Lau, Suku Aitemua, Postu Administrativu Turiskai, Munisipiu Manufahi.

“Profesór sira teste tenki ba fali Munisípiu, ohin rezolusaun ne’ebé Parlamentu Nasional hasai ho unanimidade maibé la fo solusaun, ita nia profesór kontratadu sira nafatin halo manifestasaun, prezudika profesór hotu menus iha eskola hotu-hotu, ita koko atu hadia asuntu ida ne’e.

Nune’e mos husi Bankada CNRT, Deputadu Gabriel Soares husu ba Ministeriu Edukasaun atu tau atensaun ba kondisaun edifisiu ba Servisu Edukasaun Munisipiu Ainaro no Viqueque.

“Ami halo fiskalizasaun ba iha munisípiu sira hotu, foku prinsipál ami nian mak ba iha asuntu edukasaun nian i ami halo enkontru ho diretor servisu edukasaun munisípiu, superintendenti sira, diretores sira ne’ebé mak koloka ami iha sira nia fatin, maibé ami observa katak, munisípiu rua ne’e sira nia edifisiu servisu, maka iha kondisaun ne’e ladun diak, tamba iha Viqueque nian iha tiha klean, kuandu udan, be’e ne’e la sai ba estrada, be’e ne’e tama fali ba edifisiu laran,” dehan Deputadu Gabriel.