Entidade Estadu Kambodia Apoia Adesaun Timor-Leste ba ASEAN

PHNOM PENH, www.news-viptv.com – Kambodia  liu hosi nia entidade estadu sira deklara ona sira nia apoia total ba adesaun Timor-Leste ba ASEAN.

Apoia entidade estadu Kambodia sira ne´e hato´o deretamente ba Prezidente Republika, Jose Ramos Horta wainhira hala’o enkontru kortejia ho Prezidente Senadu, Say Chun, Prezidente Asembleia Nasional, Heng Samrin no Primeiru-Ministru, Hun Sen, hodi ko’alia kona-ba reforsu relasaun bilaterál entre Timor-Leste ho Kambodia.

Enkontru ho alta entidade husi Reiñu Kambódia, reprezenta Kambodia nia prontidaun hodi apoiu Timor-Leste nia adezaun bá ASEAN.

“Primeiru-Ministru Hun Sen admira teb-tebes Timor-Leste,  nia apoia makas, tanba sira-nia istoria ne’e hanesan ita nian, tanba ne’e, nia apoia makas Timor-Leste nia adezaun bá ASEAN. Laiha assuntu, assuntu ne’ebe ko’alia ho Prezidente Assembleia Nasional, Senadu, assuntu ne’ebe ko’alia ho Primeiru-Ministru, ko’alia ho entidade ministerial sira seluk,” informa Xefe Estadu iha komunikadu ne´ebe redasaun simu hosi Gabinete Komunikasaun Sosial PR.

Tuir Prezidente Ramos-Horta, prosesu adezaun bá ASEAN seidauk kompletu, tanba líder husi nasaun sira iha ASEAN, seidauk anúnsia kalendáriu, maske Timor-Leste hakarak adere ba organizasaun ne’e iha tinan oin.

“Maibe sei tuir “road map” ne’ebé lideransa ASEAN hetan konsensu, karik mak deside no sei anúnsia karik, Ita prepara tiha ona tinan 10 mai ne’e, seidauk prepara kompletu, konforme planu governu nian atu rekruta Timoroan 2.000, mais Timoroan ne’ebé ho estudus ho kualifikasaun lingua ingleza, formasaun universitária di’ak par servisu iha setór hotu-hotu par bele aprova duni, dimaniza ita-nia partisipasaun iha ASEAN”  fundamenta Xefe Estadu.

Ba Prezidente Repúblika, partisipasaun Timor-Leste nian iha ASEAN importante tebes, tanba hola parte iha desizaun, opsaun estratéjiku, hodi dinamiza atividade ekonómika, komérsiu rejionál no seluk tan.

Hafoin remata enkontru ho Primeiru-Ministru, Hun Sen, Prezidente Republika, Jose Ramos-Horta mós sai sasin ba asinatura akordu entre Governu Timor-Leste ho Kambodia ne’ebe asina husi Ministra Negosiu Estranjeiru no Kooperasaun, Adaljiza Magno, kona-ba servisu aéreo, hodi dezenvolve konetividade aérea entre Timor-Leste no Kambódia.

Ministra Negosiu Estranjeiru no Kooperasaun, Adaljiza Magno mós assina akordu ho Kambódia kona-ba exportasaun fós bá Timor-Leste.