𝐊𝐨𝐧𝐬𝐞𝐥𝐥𝐮 𝐌𝐢𝐧𝐢𝐬𝐭𝐫𝐮 𝐃𝐞𝐥𝐢𝐛𝐞𝐫𝐚 𝐋𝐢𝐬𝐭𝐚 𝐀𝐝𝐞𝐳𝐚𝐮𝐧 𝐓𝐢𝐦𝐨𝐫-𝐋𝐞𝐬𝐭𝐞 𝐛𝐚 𝐀𝐂𝐈𝐀

DILI, www.news-viptv.com – Governu Timor-Leste liu Konsellu Ministru delibera proposta kona-ba Lista Rezervas Adezaun ba Akordu Abranjente Investimentu ASEAN (𝐀𝐂𝐈𝐀 – 𝐬𝐢́𝐠𝐥𝐚 𝐢𝐧𝐠𝐥𝐞́𝐬) iha ámbiu prosesu negosiasaun adezaun Timor-Leste nian ba ASEAN.

Proposta ne’e aprezenta husi Vise-Ministra assuntu ASEAN Milena Rangel ne’ebe reprezenta Ministru Negósiu Estranjeiru no Kooperasaun, Bendito dos Santos Freitas, Kuarta (23/4/2025) ohin, iha Sorumutuk Konsellu Ministru.

Iha komunikadu imprensa ne’ebe redasaun assesu, deliberasaun ne’e ho objetivu atu asegura komformidade Timor-Leste nian ho kompromisus rejionais ne’ebé ACIA ejize, tratadu ida ne’ebé promove liberalizasaun no protesaun ba investimentu entre Estadus-Membrus ASEAN.

“Liuhusi aprovasaun ba ninia Lista Rezervas, Timor-Leste reafirma ninia kompromisu atu kria ambiente ida ne’ebé estável no atrativu ba investimentu estranjeiru, iha tempu hanesan atu garante prezervasaun marjen fleksibilidade nian hodi proteje setores estratéjikus no apoia dezenvolvimentu nasionál,” hakerek komunikadu ne’e.

Lista ne’e identifika setór sira iha ne’ebé mak Estadu mantein direitu hodi impoin restrisoins ka fó preferénsias ba investidór nasionál sira, liu-liu iha agrikultura subsisténsia, peskas artezanais, indústria transformadora tradisionál no esplorasaun mineira, hodi garante katak adezaun ba ACIA la fó impaktu ba intereses ekonómikus no sosiais nasaun nian.