Red Notice Interpol, PR Ramos-Horta: Arnolfo Teves Jr La Elejivel ba Aziliu Politiku

DILI, www.news-viptv.com – Presidenti Republika Jose Ramos Horta deklara fujitivu Arnolfo Teves Junior alias Arnie Teves la priense kriteria atu husu aziliu politika ba estadu Timor-Leste.

Xefi estadu informa assuntu ne’e iha konferensia imprensa ne’ebe halao iha Palasiu Prezidenti, Tersa (27/5/2025).

Prezidente Ramos-Horta, hatete tanba razaun sira interese nasional nian, Timór-Leste sei la simu pedidu Teves nian ne’ebé akuza hosi autoridade filipinu sira ba omisídiu ema na’in sanulu.

Iha Tersa (27/5/2025) oras tuku 8 kalan, polisia migrasaun kaptura Teves iha nia rezidensia metiaut.

Kapturasaun ne’e viral wainhira nia video espalla iha media social.

Tribunal Rekursu Timor Leste deside ona iha fulan Marsu atu la halao extradisaun ba deputadu Arnolfo Teves Jr.

Arnie Teves, polítiku ida no eis-kongresista filipinu nian, hetan akuzasaun hosi autoridade filipinu sira hanesan responsável ba omisídiu hosi ema na’in sanulu, maibé polítiku ne’e nega envolvimentu ruma no kritika adversáriu sira tanba akuzasaun sira.

Eis membru Parlamentu Filipina ne’ebé reprezenta provínsia Negru Oriental sai hanesan autór kazu asasinatu oho ema na’in-sia (9) inklui Governadór Negro Oriental, Roel de Gamo hetan kapturasaun no detensaun  hosi autoridade Polisiál Timor-Leste bainhira halimar hela golf iha área balun iha Díli laran, Kinta loraik, 21 fulan-Marsu 2024, hale’u tuku 16:00 Otl.

Iha loron 26 fulan-Jullu tinan 2023 iha Manila-Filipina, Konsellu Anti-Terrorizmu hasai rezolusaun númeru 43 (2023) hodi konsidera  Arnolfo A. Teves, Jr ho nia grupu armadu nu’udár grupu terrorista tanba envolve iha kazu omisídiu no abuzu seksuál iha Negros Oriental.

Eis  lejizladór Falipina nian ne’e rejista hanesan red notice  INTERPOL iha fulan-Fevereiru 2023. Notifikasaun  red notice hosi INTERPOL ne’e nu’udár anúnsiu ne’ebé husu bá autoridade justisa sira iha mundu atu buka tuir no kaptura fujitivu ne’ebé presiza halo estradisaun, entrega aan no enfrenta ka kolabora ho justisa.

Arnolfo Teves Jr beibeik ona la simu akuzasaun no desizaun sira judisiáriu nian hasoru nia no duni nia sai hosi Parlamentu tanba nia hahalok la disiplina no dezobediénsia.

Entertantu Provedor Diretus Humanus no Justisa, Virgilio da Silva Guterres iha nia pajina facebook hateten: Se ita hotu fiar hanesan Na’i Prezidente katak, katak ema ne’e “simply a fugitive” entaun la iha nesesidade atu halo-fo’er Timor-Leste nia justisa, sa tan viola Konstituisaun RDTL. Kaptura ka apreensaun ba ema tenki mandadu MP ka tribunal. Atu deporta mos husik ba Tribunal mak deside. Fo servisu ba PGR ho PTR foun halo servisu. Ita labele deporta ema ida bazeia ba ministro ida nia ordem.