Produz Produtu Timor-Leste, ETT Sei Exporta ba Rai Liur

DILI, www.news-viptv.com –  Kompana fan no distribui iha Timor-Leste, East Timor Trading (ETT) iha ona planu hodi produz produtu Timor-Leste nian no exporta ba rai liur.

Prezidente ETT, Sakib Awan hateten, hafoin tinan 25 investe iha Timor-Leste, wainhira produz ona produtu Timor-Leste nian, nia parte sei exporta ba nasaun membru CPLP, Africa, Pasifiku Sul, inkliu Australia no Nova Zelandia.

“PM Xanana apoia los saida maka ami halo,” dehan Sakib Awan ba jornalista sira hafoin hasoru malu ho PM Xanana, Kinta(18/07/2024), iha Palasiu do Governo, Dili.

ETT iha nia planu dadaauk ne’e sei loke Discovery Business Industrial Zone (DBIZ) nu’udar Zona Industria ida ne’ebe sei sai hanesan dezenvolvimentu klase mundiál ida-ne’ebé harii tuir padraun konstrusaun no dezeñu Australia nian no tuir Sistema Sertifikasaun EDGE Green Building sei fornese espasu oioin.

Nu’udar uma foun ba ETT, DBIZ sei fornese fatin komersiál ba produtor sira, importador no esportador sira, no setór produtivu sira seluk.

DBIZ ne’e kompostu husi fatin eskritóriu komersiál, espasu Industrial no armazén, rezidente lokál no vizitante sira. DBIZ ne’e mos sei fornese fatin enkontru foun ida-ne’ebé vibrante no di’ak no laran dinámiku ba komunidade Dili, ne’ebé kompostu husi: Sentru otél no konferénsia, restorante sira, outlet internasionál ba hahán lalais, fatin hospitalidade no atividade halimar nian no merkadu komersiál retallu.

Investimentu ne’ebé empreza ne’e halo, hakarak kontribui bá kresimentu lokál Timor-Leste nian ne’ebé besik tebes iha Sakib Awan nia fuan.

Negósiu oioin ne’ebe ETT halao durante ne’e inklui Burger King, Gloria Jeans, Cheers no seluk tán. ETT durante ne’e fo ona servisu ba Timoroan liu 200 no wainhira DBIZ ne’e loke sei fo servisu barak liu tan ba Timoroan sira.