Prepara Atauro Sai Munisipiu, Projetu Hotu Tenki Kualidade

ATAURO, www.news-viptv.com – Primeiru Miistru Taur Matan Ruak deklara katak projetu hotu ne’ebe sei halo iha Atauro nia obra tenki ho kualidade.

Lia hirak ne’e, PM Taur ba emprezariu Atauro oan sira hodi esplika ba preparasaun Atauro sai munisipiu, liliu oinsa politika govenru snetral nian ba implementasaun projetu iha Atauro.

“Projetu sira ne’ebé sei la’o iha relasaun preparasaun ba Munisípiu Atauru sei halo ho kualidade tanba obra ne’e sei hela ba Ataúru oan sira no ba Munisípiu Ataúru,” dehan PM Taur iha komunikadu imprensa ne’ebe publika ohin (Segunda (24/1/2022).

Iha komunikadu ne’e, PM Taur mos konta ba emprezariu balun ne’ebe la gosta nian tamba nia governu la fahe projetu arbiru hanesan tempu governu anterior.

Iha Governu sira uluk, emprezáriu sira mak halo estudu ba projetu sira hodi lori ba Governu hein aprova de’it sem halo verifikasaun ruma, tanba ne’e projetu sira ne’ebé volume ki’ik mais gasta osan boot i pior la iha kualidade, tanba ne’e iha VIII Governu
Konstitusionál, nia orienta muda tiha polítika refere, katak projetu hotu-hotu, Governu mak tenke halo estudu no foin loke ba konkursu públiku, tanba ne’e Emprezáriu balun ne’ebé toman ona iha Governu anterior simu de’it projetu (ajudikasaun direta) hosi Governu, agora la gosta Xefe Governu ba polítika ida ne’e.

“Atu halo projetu ida, presija halo estudu kle’an. Projetu sira iha Governu uluk ne’e, emprezáriu sira mak halo estudu pois lori mai Governu aprova de’it, iha ha’u-nia tempu lae, ha’u muda tiha, tanba ne’e Emprezáriu sira barak la gosta ha’u tanba ida ne’e. Balun ne’ebé uluk halai tuir ha’u, agora halai lakon hotu. Sira hanoin tuir ha’u ne’e gampang, sira hanoin ha’u tenke fahe projetu hanesan uluk Abo Nana fahe ne’e. Osan la’ós ha’u nian, osan la’ós o nian, osan ne’e povu nian, tanba ne’e ita tenke jere tuir regra, halo ho kualidade labele halo soin sala. Em prinsípiu mak ida ne’e, lori uitoan halo barak la’ós lori barak halo uitoan. Se uluk Indonézia iha ne’e nia halo di’ak, agora ita na’in mak halo aat liu fali Indonézia nian, ne’e ita klamar laiha ne’e,” dehan Xefe Governu hodi hatán ba preokupasaun lider

Komunitária Munisípiu Ataúru nian, ne’ebé reprezenta emprezáriu preokupa katak proposta projetu la hetan atensaun hosi Governu, wainhira hala’o dialogu iha illa Atauru, iha loron 20 fulan janieru ne’e.

Xefe Governu fó ezemplu katak, ema ne’ebé halo projetu soin sala no buka de’it osan, kompara hanesan nia hela iha uma ida ke nia sente la’ós hanesan ninian, no wainhira nia sente falta ruma iha uma laran, nia sobu hotu uma ne’ebé nia hela ba ne’e tanba nia la iha sentimentu pertense ba uma refere, i hanesan mós ba Nasaun RDTL, se ema ne’e la sente Nasaun ne’e hanesan ninian, no hanoin de’it oinsá atu hariku nia an, nia sei halo la ho laran ba Rai ne’e.