PR Ramos-Horta Kondekora Orden Timor-Leste ba Resipiente Nasional no Internasional

Dili, www.news-viptv.com – Iha okaziaun Aniversáriu Restaurasaun Independénsia Timor-Leste nian ba dala 23, Prezidente Repúblika (PR), Jose Ramos-Horta, kondekora onra nasionál prestijiozu, Orden Timor-Leste ba resipiente nasionál no internasionál sira ba ema 99, nu’udar rekoñesimentu ba sira-nia servisu dedikadu no kontribuisaun esepsionál ba nasaun, Segunda (19/5/2025), iha Palásiu Prezidensiál Nicolau Lobato.

Iha dekretu Lei husi Prezidénsial Republika numero 21,42 no 44/2025 hatete, Kondekorasaun Orden Timor-Leste Grau Kolar, Medalla, Insígnia no Medalla Méritu no sertifikadu rekoñesimentu husi indivíduu nasionál no estranjeiru balun ne’ebé hala’o funsaun ba timoroan nia di’ak durante prosesu dezenvolvimentu nasionál.

Konsidera importánsia “Orden Timor-Leste nian”, ne’ebé estabelese hosi Dekretu-Lei No. 20/2009, loron 06 fulan-Maiu nian, nu’udar forma ida atu rekoñese méritu no dedikasaun hosi sira-ne’ebé, sidadaun no ema estranjeiru sira, ne’ebé, iha sira-nia atividade profisionál, sosiál sira ka mezmu iha hahalok espontáneu sira eroízmu nian ka altruizmu nian, kontribui ona ho signifikativu ba Timor-Leste nia di’ak, ka umanidade Timor-Leste nian.

Iha série dekretu prezidensiál, Prezidente Ramos-Horta atribui”, Orden Timor-Leste ba resipiente distintu na’in-21 ba sira-nia kontribuisaun esepsionál ba setór justisa nasaun nian, ho  resipiente na’in-17 simu Grau Kolár Orden Timor-Leste no na’in-4 simu Grau Medalla Orden Timor-Leste.

Orden Timor-Leste ba resipiente distintu na’in-78 iha setór oioin dezenvolvimentu nasionál nian,  ho na’in-20 simu Grau Kolár Orden Timor-Leste, na’in-41 simu Grau Medalla Orden Timor-Leste, na’in-16 simu Grau Insígnia Orden Timor-Leste, no na’in-ida simu Grau Medalla Méritu.

Grau Kolár Orden Timor-Leste atribui ba Eis Embaixadór Estadus Unidus Amérika nian mai Timor-Leste, Sr. Grover Joseph Rees, nu’udar rekoñesimentu ba ninia kontribuisaun esepsionál hodi hametin relasaun diplomátika entre nasaun rua ne’e.

Póstumu ho Orden Nicolau Lobato atribui ba Reverendu Padre Domingos da Silva Soares “Maubere,” nu’udar rekoñesimentu ba ninia kontribuisaun signifikativu ba Timor-Leste nia luta ba independénsia nasionál.

Kondekorasaun hirak ne’e, epslika Xefi estadu, rekoñese esforsu inkansável husi premiadu sira iha área oioin inklui akademia, kuidadu saúde, servisu governu, esforsu rezisténsia, relasaun diplomátika, no setór justisa. Sira-nia kontribuisaun fó benefísiu diretamente ba sidadaun Timoroan sira enkuantu hametin fundasaun instituisaun demokrátiku nasaun nian.

Kondekorasaun Orden Timor-Leste ho Grau Kolár, Medalla, no sertifikadu rekoñesimentu ba Autór Justisa sira ne’ebé hala’o kna’ar ba benefísiu povu Timoroan durante prosesu dezenvolvimentu nasionál.