Portugal Apoia Laptop 6 ba APC

DILI,  www.news-viptv.com – Governu Portugal liu hosi Embaixada Portugal iha Timor-Leste apoia laptop 6 ba Autoridade Proteção Civil (APC) hodi supporta servisu komando operasional ba komando operasaun municipal nian no RAEOA.

Laptop ne’e entrega deretamentu hosi ofisial ligasaun Ministeriu Administrasaun Internal Portugal, Koronel Jose Moises no adida Kooperasaun Embaixada Portugal, Dra. Cristina Faustino ba Prezidenti APC, Superintendente Polisia, Ismael da Costa Babo, Segunda (11/7/2022), iha edifisiu APC, kaikoli, Dili.

“Ohin oportunidade ida protesaun sivil hetan apoiu husi perseiru dezenvolvimentu liu husi embaixada Portugal iha Timor-Leste sira oferese laptop operasional balun para komesa atu installa ona komando operasional no mos komando operasaun munisipiu rejional RAEOA, ne’ebe laptop sira ne’e sei funsiona iha fatin sira ne’ebe mak mais esensial ba sentru operasaun sira,” dehan Superintedente Polisia Ismael da Costa Babo ba jornalista sira.

Nia informa mos, Autoridade Nasional Emerjensia Protesaun Civil Portugal disponivel sira nia peritus nain rua iha tempo badak sei mai to Timor-Leste hodi servisu hamutuk ho protesaun sivil.

Dadauk ne’e, Governu Portugal destaka ona nia peritu maka Tenente Coronel Alves ne’ebe konstribui mos ba legislasaun sira ne’ebe protesaun sivil nian, hanesan Lei Baze Protesaun Sivil no Lei Organika Protesaun Sivil.

“Protesaun Sivil komesa  ona avansa ba oin ho installa sentru operasoens  no komando operasoes sira ne’e para bele funciona fo atendimento mais rapido possivel ba sidadaun sira iha munisipiu, posto no mos ba suku sira,” nia dehan

Koronel José Moisés esplika laptop ne’ebe Portugal apoa ba APC nuudar komitmentu Governu Portugal hodi apoia servisu operasional nian.

“Ekipamentu ne’ebe ohin entrega nuudar parseria Portugal nian hodi ajuda teknikamente no kapasita servisu autoridade protesaun sivil (Timor-Leste, red) nian,” dehan Koronel Jose Moises.