Meet the Press: Governu Sei Implementa IVA

DILI, www.news-viptv.com – Hodi la depende deit ba fundu petrolifeiru no aumenta receitas ba domestika nian, Nono Governu Konstitusional iha nia programa prepara hela atu implementa Impostu Valor Akresentadu (IVA).

Primeiru Vise Primeiru-Ministru no Ministru Koordenador Assuntu Ekonomia ho Ministru Turismu no Ambiente, Francisco Kalbuadi Lay hateten asuntu ne’e iha programa meet the press ne’ebe realiza husi Sekretaria Estadu Komunikasaun Sosial (SEKOMS) foin lais ne’e.

Hare ba setor Ekonomia no Finansas Públikas, iha situasaun global hatudu katak ekonomia Timor Leste fo sinal positivu. No Fundu Internasional Monetáriu hateten katak kresimentu bele to’o 4% iha tinan 2025. Nono Governu Konstitusional iha nia programa tau mos prioridade ba Ekonomia Azul, hanesan rekursus hodi hasae kresimentu ekonómiku sustentável.

Vise Primeiru-Ministru ne’e hateten, Ekonomia azul bele sai fundu estratéjiku ba futuru Timor-Leste. Sustenta ba moris populasaun iha area costeira, fó rendimentu, no proteje ambiente. Entaun “tasi” bele sai motor desenvolvimentu no soberania ba povu Timor oan.

Hodi hasa’e kresimentu ekonomiku, governu iha nia politika mos sei estabelse Banku Dezenvolvimentu, ho objetivu dudu pequenas méedias emprezas, fo kbiit ba sidadaun hotu atu asesu lalais ba kapital.