Konsidera Grave, FRETILIN-PLP Kritika Servisu Governu iha Saude

DILI, www.news-viptv.com – Bankada opozisaun Fretilin, PLP ho KHUNTO kontinua levanta setor saude ne’ebe kontinua laiha mudansa iha servisu governu nian.

Bankada FRETILIN, Iha deklarasaun politika bankada nian ne’ebe levanta iha plenaria Segunda, Deputada Veronica Fernandes hateten, wainhira setor saude sedauk iha mudansa no halo povu terus, FRETILIN sei la nonok no kontinua hakilar.

Relasiona ho pasiente ida ne’ebe mate iha estudante estajiaru nia liman, FRETILIN konsidera ne’e ida ne’e laos tamba kulpa estuante nian, maibe falta kontrolu husi jestor ospital sira ne’ebe inkapasidade iha nia jestaun.

Nune’e mos Bankada PLP, Deputada Maria Angelina Sarmento levanta hikas situasaun saude ne’ebe levanta iha plenaria no iha provas relasiona ho problmea saude ne’ebe akontese iha Lospalos no Manatuto no husu ba responsavel saude munisipiu sira atu simu kritika hodi labele repete ou akontese tan.

Hatan ba deklarasaun politika sira ne’e, Deputadu CNRT, Patrisino dos Reis la konkorda ho lia fuan kolapsu, tamba setor saude ne’ebe hetan kritika sira ne’e funsionamentu lao hela, no husu ba povu atu labele tauk bao spital.

Nune’e mos Deputadu Mateus da crus husi Bankada CNRT husu ba Ministra Saude atu foti asaun wainhira iha duni mediku ne’ebe duni pasiente hodi lakohi atende.