João Câmara Embaixador TL ba Laos, Embaixadora Maria Bessa ba Beljika

DILI, www.news-viptv.com – Presidenti Republika Jose Ramos-Horta fo posse ba João Câmara nudar embaixador Timor-Leste ba Laos no Maria Bessa nu’udar embaixadora Timor-Leste ba Beljika, Tersa (29/7/2025), iha Palasiu Presidensial Nicolao Lobato.

Nudar Embaixadór Estraordináriu no Plenipotensiáriu ba Repúblika Demokrátika Popular Laos, João Câmara hateten nia sei tau prioridade iha area koperasaun ekonomika.

Enkuantu, Câmara antes ne’e servisu nu’udar Embaixadór ba Tailándia, Kambója, Laos no Myanmar, no Reprezentante Permanente Timor-Leste nian ba UNESCAP.

Nia kaer pozisaun xave sira iha Ministeriu Negosius Estranjeirus, inklui Diretór-Jerál ba Ázia-Pasífiku no Sekretáriu-Jerál. Iha 2024, nia nomeadu nu’udar Xefe Protokolu Estadu, hodi jere vizita ofisiál sira inklui vizita sira husi Sekretariu-Jeral ONU no Papa Francisco. Nia kontinua serbí nu’udar Sekretariu-Jeral, ho dedikasaun ba diplomasia.

Nune’e mos Maria Bessa nu’udar Embaixadóra Estraordináriu no Plenipotensiáriu ba Reinu Béljika, nia sei hametin relasaun Bilateral Reinu Béljika ho Timor-Leste.

Embaixadora Bessa sai Diplomata distintu ida, ho esperiénsia barak iha área polítika, diplomátika no edukasaun. Antes ne’e, nia okupa kargu hanesan Vise-Ministra Edukasaun no Kultura (2017–2018), Membru Parlamentu Nasionál (2012–2017), no Embaixadór ba Suisa (2021–2024). Defensora ida ba direitu feto no juventude, nia autor ba livru “Loron Ida” no servisu ho organizasaun hanesan Fundasaun Alola hodi promove kauza sosiál sira.

Nia mós servisu nu’udar Asistente Polítiku ba UNTAET, Asistente Pessoál ba eis-Prezidente Xanana Gusmão, no Asistente Polítika iha Embaixada EUA iha Timor-Leste. Ho nia kontribuisuun, Prezidente Ramos-Horta kondekora ba nia Grau Kolár Orden Timor-Leste (2024).